螺絲幾乎係現今不可或缺既野，但螺絲實在有非常之多種，剩係介紹都要花唔少既時間，今次主力同大家簡單講介螺絲同埋大家好常問到既膠塞同埋拉爆既應用。

釘≠螺絲

釘與螺絲最基本分別，釘係無牙既，通常屋企既釘都係木傢俬入面一啲唔預你拆既位就會用釘去做固定，或者可能舊少少既屋企會有既電線碼都係用釘既，有頭既釘就用鎚仔打，無頭個就用釘槍打。

螺絲就有牙既，種類多不勝數，下文再同大家介紹。

另外就係拉釘，拉釘大多數用於兩塊薄金屬既接合，多數人屋企隻窗見到既個粒類似螺絲，但又無十字牙既就係拉釘，拉釘一旦固定左之後就唔預你經常拆裝，因為拆拉釘方法就係用鑽咀直接鑽爛佢，咁打拉釘要用到既工具就係拉釘槍。

螺絲的材質分別

螺絲最高見材質方面就係碳鋼，即係一般既鋼牙螺絲，咁佢既硬度比不鏽鋼仲要高，但缺點就係防鏽能力比較差，所以比較適合用係一啲乾燥既位置到。

然後就係鍍鋅螺絲，鍍左鋅既野防腐蝕性會比較強，可以離補到鐵或者鋼容易氧化既缺點，題外話，部分人好鍾意既白鐵大部分情況下其實就係講緊鍍鋅鐵。

最後就係不鏽鋼螺絲，咁啱啱講過一般不鏽鋼既硬度係比碳鋼低，但佢既防鏽能力比以上兩種都高好多，但只是相對上高好多，並非完全不鏽，而不鏽鋼亦係三種材質既螺絲之中價錢最高既。

除左以上三種，其實仲有唔同材質既螺絲，例如導電性能強既銅螺絲等等，但一般嚟講以上三種係最常見。

螺絲頭形狀

螺絲頭最常見形狀有平頭、圓頭、六角頭、無頭、介子頭，平頭就是預你最後粒螺絲係會平左個材料表面既，圓頭既底就係平既，可以貼實材料表面，而圓頭入面又有分好多唔同弧度既，咁對一般大眾嚟講只係外表既分別。

六角頭係高強度螺絲，受力面多，就算大力扭都唔會咁易扭撻，無頭就一般用於組件上面，一般比較少用。

戒指頭就係將戒指（介子）同螺絲二合為一，增加同材料之間既增觸面積，有時間個窿同粒螺絲頭差唔多大細既時候就要用到佢。唔同既螺絲多數都會有戒指頭既版本。

而螺絲頭紋一般就有十字、一字、外六角同埋內外角，同埋外國興左一排但香港少見既正方型同埋星型螺絲等等。咁個分別就係在於用既工具唔同同埋受力既程度。

螺絲尾部分別

螺絲尾方面就係呢種比較常用於本身已經有內牙既地方到既平尾，尖尾既就有定位既作用，用係膠或木之類既地方就好方便，另外仲自攻頭，佢既作用就係好似自帶鑽咀咁，係無鑽窿既情況下直接上螺絲時鑽個窿出嚟。

螺絲類型既話大家會用到既就係鑽落膠塞到用既普通尖頭螺絲，鑽金屬用既自攻螺絲，同埋木材用既木牙螺絲，普通螺絲同自攻螺絲就可以靠個螺絲尾嚟認，木牙螺絲就可以睇枝螺絲柄，木牙螺絲柄既頭段係無牙既，呢個設計就可以令到兩塊木材之間更緊密。

自攻螺絲既話，如果目標金屬係比較硬既話，預先用鑽咀鑽個窿仔先就會無咁搖，而木牙螺絲既話一律建議鑽左窿先再上螺絲，如果唔係粒螺絲太粗係會直接逼到塊木裂開。

上螺絲應用，到底用膠塞定拉爆？

好多人讀者想知，到底我鑽咩上牆會用到膠塞定拉爆? 兩者既承重量又有幾多呀? 實際上無標準答案，因為除左種類之外，長度、粗度、材質、牆身狀況、天花或牆都係考慮因素。

首先牆身狀況，你牆身到底係石屎、紅磚、沙磚、輕磚、木或石膏板，如是石屎牆之類既高密度的石牆既話，使用拉爆係最穩陣，但如果你係沙磚輕磚既話，膠塞好有可能好過拉爆，因為佢地既密度低，拉爆呢種一路收一路會撐大個窿，反而膠塞呢種材質同埋漲起既特質會更加迫得實。

木同石膏板既話就直接上螺絲落條骨到，石膏板亦有專屬的拉爆螺絲。

至於天花吊重物就一定係平爆或者拉爆，因膠塞唔適合垂直既拉扯，當然你裝盞普通房燈既話膠塞完全無問題，但水晶燈個類就用返平爆拉爆比較穩陣，牆身如果你上下層架，放幾本書之類，綠色膠塞已經完全夠用，但如果你裝個件野係好厚身、承重量大或者不斷郁動，好似引體上升架之類，就一定要打拉爆。

拉爆愈長愈粗承重量就愈高，膠塞用綠色膠塞就無錯，再重啲就直接用拉爆，綠色膠塞嚟講，重野則用2寸長既膠塞，輕既話一寸或寸二都得，同樣長度的8/10號螺絲。

而要用到拉爆的重物，建議睇返傢私的裝裝說明書要求嚟做。

另外坊間現時有一樣叫混凝土自攻既螺絲其實都非常厲害，佢係你鑽完窿之後直接用電批加套裝收入去就得，據稱受力仲勁過拉爆，裝拆方面都方便唔少，但就唔建議經常裝拆，因為愈拆佢會愈唔實。呢粒野係台灣已經好興，但香港工程方面未見普及。

閱讀更多：